habaru page ad two

ރ. މަޑުއްވަރީގައި 400 ކިލޯވޮޓް-ޕީ (kWp) ގެ ސޯލާ ޕީ.ވީ. ހައިބްރިޑް ނިޒާމެއް ޤާއިމުކުރުމުގެ މަސައްކަތް ފޯރިއާއެކު ކުރިއަށްދާ ކަމަށް ތިމާވެއްޓާއި ބެހޭ ވުޒާރާއިން ހާމަކޮށްފި އެވެ. މި މަޝްރޫޢުގެ ދަށުން 344 ކިލޯވޮޓް-އަވަރ (kWh) ގެ ބެޓެރީ އެނަރޖީ ސްޓޯރޭޖް ސިސްޓަމް (BESS) އެއް ވެސް ގާއިމުކުރެވޭނެ އެވެ.

ތިމާވެއްޓާއި ބެހޭ ވުޒާރާއިން ބުނީ، ރާއްޖޭގެ ރައްޔިތުންނަށް ދެމެހެއްޓެނިވި އަދި ތިމާވެއްޓާ ރައްޓެހި ހަކަތަ ފޯރުކޮށްދިނުމަށް ސަރުކާރުން ކުރަމުންދާ މަސައްކަތްތަކުގެ މުހިންމު ބައެއްގެ ގޮތުގައި މި މަޝްރޫޢު ހިންގަމުންދާ ކަމަށެވެ. މި ނިޒާމް މަސައްކަތްކުރަން ފެށުމާއެކު، އަހަރަކު 187,902 ލީޓަރުގެ ޑީޒަލް ބޭނުންކުރުން ކުޑަކުރެވޭނެ ކަމަށް ލަފާކުރެވޭއިރު، 460 ޓަނުގެ ކާބަން ޑައިއޮކްސައިޑް (CO₂) ތިމާވެއްޓަށް ބޭރުވުން މަދުކުރެވޭނެކަމަށް ވެސް އެވުޒާރާއިން ވަނީ ހާމަކޮށްފައެވެ. މިއީ ރާއްޖޭގެ ތިމާވެށި ރައްކާތެރިކުރުމަށާއި، ކާބަން ބޭރުކުރާ މިންވަރު ކުޑަކުރުމަށްޓަކައި ސަރުކާރުން އަޅާ ވަރަށް މުހިންމު ފިޔަވަޅެއް ކަމަށް ވެސް ވުޒާރާއިން ސިފަކޮށްފައިވެއެވެ.

މި މަޝްރޫޢަކީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވިޝަން ހާސިލްކުރުމަށް އެޅުނު މުހިންމު ފިޔަވަޅެކެވެ. ރައީސް ޑރ. މުޢިއްޒުގެ ވިޝަންގައިވާ ގޮތުން، 2028 ވަނަ އަހަރުގެ ނިޔަލަށް، ރާއްޖޭގައި ކަރަންޓު އުފެއްދުމުގެ 33 އިންސައްތަ އިއާދަކުރަނިވި ހަކަތައިން ހޯދުމަށް ސަރުކާރުން ވަނީ އަމާޒު ހިފާފައެވެ. މިކަމަށްޓަކައި ރާއްޖޭގެ އެކި ކަންކޮޅުތަކުގައި މިފަދަ ބޮޑެތި މަޝްރޫޢުތައް ހިންގުމަށް ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ.

ރ. މަޑުއްވަރީގައި މި ނިޒާމް ޤާއިމުކުރުމުން، ރަށުގެ ކަރަންޓު ޚަރަދު ކުޑަވެ، ރައްޔިތުންނަށް ލިބޭ ހަކަތަ އިތުރަށް ހަމަޖެހިގެންދާނެ ކަމަށް ސަރުކާރުން އުންމީދުކުރެއެވެ. މިފަދަ މަޝްރޫޢުތަކުގެ ސަބަބުން، ދިވެހިރާއްޖެއަކީ ދެމެހެއްޓެނިވި ހަކަތައިގެ މައްޗަށް ބަރޯސާވާ، ތިމާވެއްޓާ ރައްޓެހި ޤައުމަކަށް ހެދުމަށް މަގުފަހިވާނެ ކަމަށް ވެސް ތިމާވެއްޓާއި ބެހޭ ވުޒާރާއިން ވަނީ ފާހަގަކޮށްފައެވެ.

މަޑުއްވަރީގައި 400 ކިލޯވޮޓް-ޕީގެ ސޯލާ ހައިބްރިޑް ނިޒާމެއް ޤާއިމުކުރުމުގެ މަސައްކަތް ކުރިއަށްދަނީ!

ފާއިތުވެދިޔަ ދެ އަހަރު އިސްލާމީ ހިދާޔަތާއި އިސްލާމީ ނޫރު ފެތުރުއްވުުމަށް ގިނަ މަސައްކަތްތަކެއް ކުރެވިފައިވާކަމަށް އިސްލާމީކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވެއްޖެއެވެ.

ވަޒީރު މިހެން ވިދާޅުވީ އިސްލާމީކަންތައްތަކާ ބެހޭ ވުޒާރާއިން ބާއްވާ މީޑިއާ މައުރަޒު ހުޅުވުމަށް ބޭއްވުނު ރަސްމިއްޔާތުގައި ވާހަކަފުޅު ދައްކަވަމުންނެވެ. ވަޒީރު ވިދާޅުވީ، ރައީސުލްޖުމުހޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ ދަށުން އިސްލާމީ ނޫރާއި ހިދާޔަތު ފޯރުކޮށްދިނުމަށް ބޮޑެތި މަސައްކަތްތަކެއް ކުރެވިފައިވާކަމަށާއި މި މައުރަޒުގެ މަޤުސަދަކީ މިނިސްޓްރީން ކުރެވިފައިވާ ކަންކަން ރައްޔިތުންނާއި ހަމައަށް ގާތުން ފޯރުކޮށްދީ މިނިސްޓްރީގެ މަޢުލޫމާތު އާއްމުންނާއި މީޑިއާތަކާއި ހަމައަށް ގެނެސްދިނުންކަމަށެވެ.

ވަޒީރުގެ ވާހަކަފުޅުގައި ވަނީ މީޑިއާ މައުރަޒު ހުޅުވައިދެއްވުމަށްޓަކައި ރައްޔިތުންގެ މަޖިލީހުގެ ޢިއްޒަތްތެރި ރައީސް އޮނަރަބަލް ޢަބްދުއްރަޙީމް ޢަބްދުﷲ ވަޑައިގެންދެއްވިކަމަށްޓަކައި އެމަނިކުފާނަށް ޝުކުރު އަދާ ކުރައްވާފައެވެ.

އިސްލާމީކަންތައްތަކާ ބެހޭ ވުޒާރާގެ އިސްލާމިކް ސްޓޫޑިއޯއިން އިސްނަގައިގެން ވުޒާރާގެ ސެކްޝަންތަކާއި ގުޅިގެން ކުރިއަށް ގެންދާ މީޑިއާ މައުރަޒަކީ ސެކްޝަންތަކުން ކުރިއަށް ގެންދާ މަސައްކަތްތަކުގެ މަޢުލޫމާތާއި، ކުރެވެމުންދާ މުހިއްމު މަސައްކަތްތަކާއި މަޝްރޫޢުތަކާއި ގުޅޭ މަޢުލޫމާތު އާއްމުންނާއި މީޑިއާތަކަށް ވީހާވެސް ގާތުން ފޯރުކޮށްދިނުމަށް ކުރިއަށް ގެންދެވޭ މައުރަޒެކެވެ.

މި މައުރަޒުގެ އެކި ސްޓޯލްތަކުން ކުޑަކުދިންނާއި ގުޅޭ ޝައުޤުވެރި އެކި ހަރަކާތްތައްވެސް ކުރިއަށް ގެންދާކަން ފާހަގަކޮށްލެވެއެވެ. އެގޮތުން މޮސްކު މެނޭޖްމެންޓް ސެކްޝަނުން، މިމްބަރުގައި ޚުޠުބާ ކިޔުމުގެ ފުރުސަތު ތުއްތު ކުދިންނަށް ލިބޭނެ އިންތިޒާމް ވަނީ ހަމަޖައްސާފައެވެ.

މީޑިއާ މައުރަޒު މިއަދު ހެނދުނު 10:00 އިން ހަވީރު 18:00 އާއި ހަމައަށް މައުރަޒު ކުރިއަށްދާނެއެވެ.

މި މައުރަޒުގައި ޒުވާން ޚަޠީބުން ތަމްރީން ޕްރޮގުރާމުގެ ފަސް ވަނަ ބުރުގައި ރަޖިސްޓްރީވުމުގެ ފުރުސަތުވެސް ވަނީ ހުޅުވާލެވިފައެވެ. މީގެ އިތުރުން ޝައިޚުންނާއި ކުރަން ބޭނުންވާ ސުވާލުތައް ފަސޭހަކަމާއެކު ކުރެވޭނެ އިންތިޒާމްވެސް ހަމަޖެހިފައިވެއެވެ.

ފާއިތުވެދިޔަ ދެ އަހަރު އިސްލާމީ ހިދާޔަތާއި އިސްލާމީ ނޫރު ފެތުރުއްވުުމަށް ގިނަ މަސައްކަތްތަކެއް ވަނީ ކުރެވިފައި – ވަޒީރު

ބެޑްމިންޓަން ވޯލްޑް ފެޑެރޭޝަން (ބީޑަބްލިއުއެފް) އިން މޯލްޑިވްސް ބެޑްމިންޓަން އެސޯސިއޭޝަން (ބީއޭއެމް) ގެ މައްޗަށް އެޅުނު ސަސްޕެންޝަން ރަސްމީކޮށް އުވާލައިފިއެވެ. މި ނިންމުމާއެކު، ގިނަ މަސްތަކެއްގެ އިދާރީ ހަމަނުޖެހުންތަކަށްފަހު ދިވެހިރާއްޖެއަށް ބީޑަބްލިއުއެފްގެ ފުރިހަމަ މެންބަރުކަން އަލުން ވަނީ ލިބިފައެވެ.

މި ސަސްޕެންޝަން މޭމަހު އެޅުނުއިރު، އޭގެ އަސްލަކީ ދިވެހިރާއްޖޭގެ އޮލިމްޕިކް ކޮމިޓީއާއި ކޮމިޝަނާ އޮފް ސްޕޯޓްސް އިން ބީއޭއެމް ތިން މެންބަރުންގެ އެޑް-ހޮކް ކޮމިޓީއެއްގެ ދަށަށް ގެނައުމުންނެވެ. މިކަމުގެ ސަބަބުން ދިވެހި ކުޅިވަރުގެ އިދާރާތަކުން ބީއޭއެމްގެ ކަންކަމަށް ނުފޫޒު ފޯރުވާ ކަމަށް ބީޑަބްލިއުއެފްއިން ނިންމިއެވެ. މި ހަމަނުޖެހުންތައް ކުރިއަށް ދިޔައީ، ބީއޭއެމްގެ އެގްޒެކެޓިވް ކޮމިޓީގެ ދައުރު މިދިޔަ އަހަރުގެ މާޗް މަހު ހަމަވެފައިވުމުން ދިމާވި ދިގުދެމިގެންދިޔަ ދާޚިލީ މައްސަލަތަކަކާ ގުޅިގެންނެވެ.

މި މައްސަލަ ޙައްލުކުރުމަށްޓަކައި، ބީއޭއެމްގެ ކުރީގެ އިސްވެރިންނާއި، ދިވެހިރާއްޖޭގެ އޮލިމްޕިކް ކޮމިޓީއާއި، ބީޑަބްލިއުއެފްގެ ކަމާބެހޭ ފަރާތްތައް ހިމެނޭ ގުޅިފައިވާ ވޯކިންގ ގްރޫޕެއް ވަނީ އެކުލަވާލާފައެވެ. މި ގްރޫޕުން ވަނީ ބީއޭއެމްގެ ޤަވާއިދުތަކަށް ކާމިޔާބުކަމާއެކު އިސްލާޙު ގެނެސް، ނޮވެމްބަރު 1 ވަނަ ދުވަހު އެ ޤަވާއިދުތައް ރަސްމީކޮށް ބަލައިގެންފައެވެ. އަދި ނޮވެމްބަރު 22 ވަނަ ދުވަހު، ބީޑަބްލިއުއެފްގެ ބޭފުޅުންގެ ހާޒިރުގައި އިންތިޚާބެއް ބާއްވައި، އައު އެގްޒެކެޓިވް ކޮމިޓީއެއް ވަނީ ހޮވައިފައެވެ.

މި އިސްލާޙީ މަސައްކަތްތައް ނިމުމުން، ބީޑަބްލިއުއެފްގެ ކައުންސިލް ޑެލިގޭޓެޑް ގްރޫޕްއިން ވަނީ ބީއޭއެމްގެ މެންބަރުކަން އަލުން ދީފައި އަދި ދިވެހި ކުޅިވަރުގެ އިދާރާތަކުން ދިން އެހީތެރިކަން ފާހަގަކޮށްފައެވެ. މީގެ އިތުރުން، ކޮމިޝަނާ އޮފް ސްޕޯޓްސްއިން ވެސް މި ހަފްތާގައި ކުރިން ނިންމެވި ނިންމުން ބަދަލުކުރައްވައި، ބީއޭއެމްގެ ގައުމީ ދަރަޖަ އަނބުރާ ދެއްވައިފައެވެ.

މި ސަސްޕެންޝަންގެ ސަބަބުން ދިވެހިރާއްޖެއަށް ބައިނަލްއަޤްވާމީ ބެޑްމިންޓަން މުބާރާތްތަކުގައި ބައިވެރިވުމުގެ ފުރުސަތު ކުޑަވެފައިވި ނަމަވެސް، ފާއިތުވި މަސްތަކުގައި ކުޅުންތެރިންނަށް ލުއިތަކެއް ވަނީ ދެވިފައެވެ. ސަސްޕެންޝަން މުޅިން ނެގުމާއެކު، ދިވެހި ބެޑްމިންޓަން އަށް ބައިނަލްއަޤްވާމީ ފެންވަރުގައި ކުރިން ކުރަމުންދިޔަ މަސައްކަތްތައް އަލުން ކުރިއަށް ގެންދެވޭނެކަމަށް ބެލެވެއެވެ.

ބެޑްމިންޓަން ވޯލްޑް ފެޑެރޭޝަނުން ރާއްޖޭގެ ސަސްޕެންޝަން އުވާލައިފި: ފުރިހަމަ މެންބަރުކަން އަލުން ލިބިއްޖެ

މޯލްޑިވްސް ހައްޖު ކޯޕަރޭޝަންގެ ނަމުގައި އޮޅުވާލައިގެން ފޭކު މެސެޖުތައް ދައުރުކުރަމުންދާތީ އެކަމަށް ސަމާލުވުމަށް އެ ކޯޕަރޭޝަނުން މިއަދު ވަނީ އާންމުންނަށް އިލްތިމާސްކޮށްފައެވެ. މި މެސެޖުތައް ފޮނުވަނީ މަކަރާއި ހީލަތުން ފައިސާ ހޯދުމުގެ ގޮތުން ކަމަށް ހައްޖު ކޯޕަރޭޝަނުން ވަނީ ބުނެފައެވެ.

ހައްޖު ކޯޕަރޭޝަނުން ނެރުނު ބަޔާނެއްގައިވާ ގޮތުން، އެ ކޯޕަރޭޝަނުގެ ނަމުގައި އާންމުންގެ ފޯނުތަކަށް ފޭކު މެސެޖުތަކެއް ފޮނުވަމުންދާ ކަން ވަނީ ފާހަގަކުރެވިފައެވެ. މިގޮތުން، ހައްޖަށް ދިޔުމަށް އިތުރަށް ފައިސާ ދެއްކުމަށް ހައްޖު ދަތުރުގެ ޖާގަ ކަށަވަރުވާނެ ކަމަށް ބުނެ ފޭކު މެސެޖުތައް ފޮނުވާކަން އެ ކޯޕަރޭޝަނުން ވަނީ ފާހަގަކޮށްފައެވެ. މިކަމުގެ ސަބަބުން، ހައްޖަށް ދާން ބޭނުންވާ ފަރާތްތަކުން އޮޅުވާލުމެއްގެ ތެރެއަށް ވެއްދިދާނެ ކަމުގެ ކަންބޮޑުވުން ވަނީ ފާޅުކޮށްފައެވެ.

ހައްޖު ކޯޕަރޭޝަނުން ބުނެފައިވަނީ، ރާއްޖެއިން މީހުން ހައްޖަށް ގެންދިޔުމަށް އެ ކޯޕަރޭޝަނުން ކަނޑައަޅާފައިވާ އަގުތަކުގެ އިތުރަށް އެއްވެސް ފައިސާއެއް ނުނަގާނެ ކަމަށެވެ. އެހެންކަމުން، މިފަދަ މެސެޖުތަކަށް ނުވަތަ ފޯން ކޯލުތަކަށް އިތުބާރު ނުކުރުމަށް ވަނީ އިލްތިމާސްކޮށްފައެވެ.

"މަކަރާއި ހީލަތުން ފައިސާ ހޯދުމަށް ފޮނުވާ މިފަދަ މެސެޖުތަކާއި، ކުރާ ފޯން ކޯލުތަކަށް ސަމާލުވުމަށް އެންމެހާ ބޭފުޅުންގެ ސަމާލުކަމަށް ދަންނަވަން،" ހައްޖު ކޯޕަރޭޝަނުގެ ބަޔާނުގައި ބުނެފައިވެއެވެ.

އިސްލާމްދީނުގެ މާތް އަޅުކަމަކާ ގުޅުވައި މަކަރާއި ހީލަތުން ފައިސާ ހޯދަމުން މިދާ ކަންކަމަކީ ހައްޖު ކޯޕަރޭޝަނުން އިންތިހާއަށް ކަންބޮޑުވެ ހިތާމަކުރާ ކަމެއް ކަމަށް އެ ބަޔާނުގައި ފާހަގަކޮށްފައިވެއެވެ. އަދި އެ ކޯޕަރޭޝަނުން ވަނީ މިފަދަ ޖަރީމާތައް ހަރުކަށި އިބާރާތުން ކުށްވެރިކޮށްފައެވެ.

ހައްޖު ކޯޕަރޭޝަނުގެ ނަމުގައި ފޭކު މެސެޖުތައް ދައުރުކުރާތީ ސަމާލުވުމަށް އަންގައިފި

ޕީއެސްއެމުން އިސްނަގައިގެން ރާއްޖޭގެ ގިނަ މީޑިއާތަކަކާ ގުޅިގެން ކުރިއަށް ގެންދިޔަ "ސިލޯނާއެކު ދިވެހީން" ޓެލެތޯނަށް ލިބުނު 800،352 ޑޮލަރު ނުވަތަ 245 މިލިއަން ލަންކާ ރުޕީސް، މިއަދު ލަންކާ ސަރުކާރާ ހަވާލުކޮށްފިއެވެ. މި އެހީއަކީ ލަންކާއަށް އެރި ތޫފާން "ޑިޓްވާ" އަދި ބޯކޮށް ވާރޭ ވެހުމުގެ ސަބަބުން ހާލުގައި ޖެހިފައިވާ މީހުންނަށް އެހީވުމަށް ދިވެހި ރައްޔިތުން ދީފައިވާ އެހީއެކެވެ.

މި ޓެލެތޯން ކުރިއަށް ގެންގޮސްފައިވަނީ 29 ގަޑިއިރަށެވެ. ރާއްޖޭގެ 30 އަށް ވުރެ ގިނަ މީޑިއާތަކުން ބައިވެރިވި މި ޓެލެތޯންގައި، ރާއްޖޭގެ ހުރިހާ ރައްޔިތުންނާއި، ޖަމިއްޔާ ޖަމާއަތްތަކާއި، ކްލަބްތަކާއި، އޮފީސްތައް ފަދަ ހުރިހާ ފަރާތްތަކަށް ވަނީ ބައިވެރިވުމުގެ ފުރުސަތު ހުޅުވާލާފައެވެ. މިގޮތުން ކުންފުނިތަކާއި ވުޒާރާތަކާއި މުވައްސަސާތަކާއި ސަރުކާރުގެ ކުންފުނިތަކުންނާއި އަމިއްލަ ފަރާތްތަކުން ވަނީ މި ޓެލެތޯނަށް ބޮޑު އެހީތެރިކަމެއް ފޯރުކޮށްދީފައެވެ.

އެގޮތުން، މި ޓެލެތޯނަށް އެންމެ ބޮޑު އެހީތެރިކަމެއް ފޯރުކޮށްދިނީ ފުލުހުންނާއި ސިފައިންނެވެ. ފުލުހުންގެ ފަރާތުން 2.4 މިލިއަން ރުފިޔާ ހަދިޔާ ކުރިއިރު، ސިފައިންގެ ފަރާތުން އެއް މިލިއަން ރުފިޔާ ހަދިޔާ ކުރިއެވެ. ނޮވެމްބަރު 30 ވަނަ ދުވަހު ފެށި މި ޓެލެތޯނަށް ލިބުނު ފައިސާ ޕީއެސްއެމް އިން ފުރަތަމަ ހަވާލު ކުރީ ހާރިޖީ ވުޒާރާއާއެވެ. މިއަދު މި ފައިސާ ރަސްމީކޮށް ލަންކާއާ ހަވާލުކޮށްދެއްވީ ލަންކާގައި ހުންނަ ރާއްޖޭގެ ސަފީރު މަސްއޫދު އިމާދެވެ.

މި އެހީތަކުގެ އިތުރުން، ދިވެހި ސަރުކާރުން ހަދިޔާ ކުރި 25،000 ކޭސް މަސްދަޅުވެސް މިއަދު ލަންކާ ސަރުކާރާ ވަނީ ހަވާލުކުރައްވާފައެވެ. އަދި އޭގެ ކުރިން ދިވެހި ސަރުކާރުން ދިން 50،000 ޑޮލަރުވެސް ވަނީ ލަންކާއާ ހަވާލުކޮށްފައެވެ. މީގެ އިތުރުން، ރާއްޖޭގެ އެކި ކުންފުނިތަކުންވެސް ދަނީ ލަންކާއަށް އަމިއްލަ ގޮތުން ބޮޑު އެހީތެރިކަމެއް ފޯރުކޮށްދެމުންނެވެ.

ލަންކާ އަށް އެރި ތޫފާން "ޑިޓްވާ" ގެ ސަބަބުން ކުރިމަތިވި ކާރިސާގައި މަރުވި މީހުންގެ އަދަދު މިހާރު ވަނީ 607 އަށް އަރާފައެވެ. އަދި ވީނުވީއެއް ނޭނގި ގެއްލިގެން ހޯދަމުން އަންނަ މީހުންގެ އަދަދު ވެސް ވަނީ 200 އަށް ވުރެ މައްޗަށް އަރާފައެވެ.

"ސިލޯނާއެކު ދިވެހީން" ޓެލެތޯނަށް ލިބުނު 8 ލައްކަ ޑޮލަރު ލަންކާއާ ހަވާލުކޮށްފި

ސްރީލަންކާއަށް ކުރިމަތިވި މޫސުމީ ކާރިސާއިން އަރައިގަތުމަށް މަސައްކަތް ކުރަމުންދާ މި ދަނޑިވަޅުގައި، ދިވެހިރާއްޖެއިން ފޯރުކޮށްދިން ދީލަތި އެހީތެރިކަމަށް ލަންކާގެ ރައްޔިތުންނާއި ރާއްޖޭގައި ދިރިއުޅޭ ލަންކާ ރައްޔިތުން ހިތުގެ ފުންމިނުން ޝުކުރު އަދާކޮށްފިއެވެ. އެމީހުން ބުނާ ގޮތުގައި ދިވެހީންނަކީ ހިތްހެޔޮ، އެކުވެރި އަދި އެއްބައިވަންތަ ބައެކެވެ.

ރާއްޖެއިން ލަންކާއަށް ވެދެއްވި އެހީތެރިކަމަށް ޝުކުރު އަދާކުރުމުގެ ގޮތުން، ރާއްޖޭގައި ދިރިއުޅޭ ލަންކާ ރައްޔިތުން މިއަދު ހަވީރު މާލޭގެ ބޮޑުތަކުރުފާނު މަގުގައި، މާލެ ސިޓީ ކައުންސިލްގެ އެކުވެނި ކައިރީގައި ވަނީ ސުލްހަވެރި އެއްވުމެއް ބާއްވާފައެވެ. މި މުހިންމު އިސްނެގުމުގައި ލަންކާގެ ގިނަ ރައްޔިތުން ބައިވެރިވެ، ޝުކުރުގެ ޕޯސްޓަރުތައް ހިފަހައްޓައިގެން ތިއްބެވެ. 

މި އެއްވުމުގެ ބޭނުމަކީ، ލަންކާއަށް ދިމާވި މޫސުމީ ކާރިސާގެ ސަބަބުން ހާލުގައި ޖެހިފައިވާ ރައްޔިތުންނަށް ރާއްޖެއިން ފޯރުކޮށްދިން އެހީތެރިކަމަށް ޝުކުރު އަދާކުރުމެވެ.

މި އެއްވުމުގައި ބައިވެރިވެވަޑައިގަންނަވަމުން ލަންކާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު މުހައްމަދު ރިޒްވީ ހަސަން މީޑިއާތަކަށް ދެއްވި އިންޓަވިއުއެއްގައި ވިދާޅުވީ، ލަންކާއަށް ދިމާވެފައިވާ ހިތްދަތި ދަނޑިވަޅުގައި ރާއްޖެއިން ދިން އެހީތެރިކަން ތާރީހުގައި ރަން އަކުރުން ލިޔެވޭނެ ކަމަށެވެ. އަދި އެ އެހީތެރިކަމަށްޓަކައި ރައީސުލްޖުމްހޫރިއްޔާ ޑރ. މުހައްމަދު މުއިއްޒަށާއި، ދިވެހި ސަރުކާރަށާއި، އަމިއްލަ ވިޔަފާރިވެރިންނަށާއި ދިވެހި ރައްޔިތުންނަށް ވަރަށް ބޮޑަށް ޝުކުރު އަދާކުރައްވާ ކަމަށް ސަފީރު ވިދާޅުވިއެވެ.

"ލަންކާއާއި ރާއްޖެއާ ދެމެދު މި އޮތް ގުޅުން އެއްވެސް މީހަކަށް އަދި އެއްވެސް ފަރާތަކަށް ބައިބައި ނުކުރެވޭނެ. މި ގުޅުމަކީ، ދުވަހަކުވެސް ބައިބައިވާނެ ގުޅުމެއް ނޫން. މި ސަރަހައްދުގައި ލަންކާއާ އެންމެ ގާތް ގުޅުމެއް ބާއްވަމުން އަންނަ ޤައުމަކީ، ރާއްޖެކަން މި އެހީތެރިކަމުން ދައްކުވައިދީފި،" ސަފީރު ވިދާޅުވިއެވެ.

މި އެއްވުމުގައި ބައިވެރިވި ލަންކާ ރައްޔިތެއް ކުރެއްވި ޓްވީޓެއްގައި ވަނީ، ކަމެއް ދިމާވާ ހިނދު ދިވެހިންނަކީ އެކުވެރި އެއްބައިވަންތަ ބައެއްކަން ހާމަވެގެން ދިޔަ ކަމަށް ބުނެފައެވެ. އަދި މިވަގުތު ލަންކާގައި ދިރިއުޅޭ ރައްޔިތުންނާއި ރާއްޖޭގައި ދިރިއުޅޭ ލަންކާއަށް ނިސްބަތްވާ ހުރިހާ ބޭފުޅުންގެ ހިތްތަކުގައި ވަނީ ރާއްޖެއަށް ޝުކުރުގެ ތައުރީފާއި ހެޔޮ ދުއާ ކަމަށްވެސް އެ މެސެޖުގައި ބުނެފައިވެއެވެ.

އެއްވުމުގައި ބައިވެރިވި އިތުރު ލަންކާ ރައްޔިތަކު ވިދާޅުވީ، "ލަންކާ އަލުން ކޮޅަށް ޖެހި ގެއްލުންތަކުން އަރައިގަންނަން މަސައްކަތް ކުރަމުން މިދާ ދަނޑިވަޅުގައި، ދިވެހިންގެ ފަރާތުން އަޅުގަނޑުމެންނަށް ވަރަށް ބޮޑު އެއްބާރުލެއްވުން ލިބެމުންދޭ. މިއަދު ސްރީލަންކާގައި ދިރިއުޅޭ ރައްޔިތުން ތިބީ ރާއްޖޭގެ ރައްޔިތުންނަށް ޝުކުރު އަދާކުރުމުގައި. ކުރުކޮށް ދަންނަވާނަމަ، ދިވެހީންނަށް ޝުކުރިއްޔާ! އަޅުގަނޑުމެންގެ ވަރަށްގިނަ އަދަދެއްގެ މީހުން މިއަދު މިތަނަށް ނާދެވުނީ އެކި ރަށްރަށުގައި މަސައްކަތް ކުރާތީ."

ލަންކާ ރައްޔިތުން ބުނާ ގޮތުގައި ރާއްޖެއަކީ މިހާރު އެމީހުންގެ ދެވަނަ ގެއެވެ. އަދި ކަމެއް ދިމާވެ އެހީއަކަށް ބޭނުންވާ ވަގުތު ކުރެވެން ހުރި ހުރިހާ މަސައްކަތެއް ކުރައްވާނެ ކަމަށްވެސް ލަންކާ ރައްޔިތުން ވަނީ ބުނެފައެވެ.

ތޫފާން ޑިޓްވާގެ ސަބަބުން ލަންކާއަށް ކުރިމަތިވި ނުރައްކާތެރި މޫސުމީ ހާލަތުގެ ސަބަބުން ގެއްލުން ލިބުނު ފަރާތްތަކަށް އެހީތެރިވުމުގެ ގޮތުން ރާއްޖެއިން ވަނީ ބޮޑެތި އެހީތައް ފޯރުކޮށްދީފައެވެ. އެގޮތުން، ރާއްޖެއިން ހަދިޔާކުރި 25,000 ކޭސް މަސްދަޅު މިއަދު ލަންކާއަށް ގެންގޮސްފައިވާއިރު، މި މަސްދަޅު ކޭސް ލަންކާއާ ހަވާލުކުރެއްވީ ކޮލޮމްބޯގައި ހުންނަ ރާއްޖޭގެ ހައިކޮމިޝަނަރެވެ. މީގެ އިތުރުން ދިވެހި ސަރުކާރުން ވަނީ ލަންކާއަށް 50,000 ޑޮލަރުގެ މާލީ އެހީއެއްވެސް ހަދިޔާ ކުރައްވާފައެވެ.

އަދި ލަންކާއަަށް އެހީވުމަށް ޕަބްލިކް ސަރވިސް މީޑިއާ (ޕީއެސްއެމް) އިން އިސް ނަގައިގެން ރާއްޖޭގެ ގިނަ މީޑިއާތަކަކާ ގުޅިގެން ކުރިއަށް ގެންދިޔަ "ސިލޯނާއެކު ދިވެހީން" ޓެލެތޯނަށްވެސް 800,352 ޑޮލަރު ނުވަތަ 245 މިލިއަން ލަންކާ ރުޕީސް ވަނީ ލިބިފައެވެ. ޓެލެތޯނާއި، ދިވެހި ސަރުކާރުގެ އިތުރުން އަމިއްލަ ދިވެހި ވިޔަފާރިވެރިން ފޯރުކޮށްދިން އެހީތަކާއެކު ރާއްޖެއިން ލަންކާއަށް ވި އެހީތެރިކަން ޖުމްލަ 2.4 މިލިޔަން ޑޮލަރަށް އަރައެވެ.

ލަންކާ ރައްޔިތުންގެ ހިތްތަކުގައި ދިވެހީންނަށް ޝުކުރު: 'ދިވެހީންނަކީ ހިތްހެޔޮ ބައެއް

ޝަރީއަތް ނިމެންދެން ބަންދުގައި މިވަގުތު 347 މީހުން ތިބިކަމަށާއި، މީގެތެރޭގައި ގިނައީ ބޮޑެތި ކުށްތަކުގެ ތުހުމަތުގައި ބަންދުކޮށްފައި ތިބި މީހުންކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު މިރޭ ވިދާޅުވެއްޖެއެވެ. އެކަންކަން ރަނގަޅަށް ބެލުމެއްނެތި އެމީހުން ދޫކޮށެއް ނުލެވޭނެކަމަށް ރައީސް ފާހަގަކުރެއްވިއެވެ.

ރައީސް މިހެން ވިދާޅުވީ، މާފަންނު ރައްޔިތުންނާ ބައްދަލުކުރެއްވުމުގެ ތެރެއިން އާއްމު ރައްޔިތަކު ފާޅުކުރެއްވި ކަންބޮޑުވުމަކަށް ޖަވާބުދެއްވަމުންނެވެ. ވަނުވާ ބަންދުގެ މައްސަލަ މީގެ ކުރިން އޮތީ އެއްގޮތަކަށްވެސް "ވާ ނުވާ ނޭނގޭ" މައްސަލައެއްގެ ގޮތުގައި ކަމަށް ރައީސް ވިދާޅުވިއެވެ. އެކަން އެހެން ވެފައި އޮތީ ކްރިމިނަލް ކޯޓާއި ޑްރަގް ކޯޓު ހިންގުމަށް އެކަށީގެންވާ ވަސީލަތްތައް ހަމަނުޖެހި، މައްސަލަތައް ފުނި ޖެހުމުން ކަމަށް ރައީސް ވިދާޅުވިއެވެ.

މި ސަރުކާރުން ވަރަށް ބޮޑަށް މަސައްކަތް ކޮށްގެން މި ދެ ކޯޓު ހިންގާނެ ތަން ހަމަޖައްސައިދީފައިވާ ކަމަށް ރައީސް ވިދާޅުވިއެވެ. އޭގެ ނަތީޖާއަކީ ޝަރީއަތް ހިނގާނެގޮތް އެއްވެސް ގޮތެއް ނޭނގި ވާނުވާގައި ތިބި މީހުންގެ ޝަރީއަތް ކުރެވޭނެ ދުވަހާއި، މި މައްސަލަތައް އަވަހަށް ބެލޭނެ ގޮތް ހަމަޖެހިގެން ދިއުން ކަމަށް ރައީސް ފާހަގަކުރެއްވިއެވެ.

"މިހާރު ވަރަށް ގިނަ މައްސަލަތައް ހައްލުކުރެވި ވާނުވާ ފުނިޖެހިފައި ހުރި މައްސަލަތައް ބެލެމުން އެދަނީ. ކުރީގައި ކެޕޭސިޓީ ނެތީ. ޖާނަ ނެތީމަ ނުބެލިފައި ހުރި ކަންތައްތައް." ރައީސް ވިދާޅުވިއެވެ.

ރައީސް ވިދާޅުވި ގޮތުގައި މިވަގުތު ވާނުވާ ބަންދުގައި ތިބި 347 މީހުންނަކީ މީހުން މެރުން، ޓެރަރިޒަމް، ކުޑަކުދިންނަށް ޖިންސީ ގޯނާކުރުން، މާރާމާރީ ހިންގުން، އަދި މަސްތުވާތަކެތީގެ ވިޔަފާރިކުރުން ފަދަ ބޮޑެތި ކުށްތަކުގެ ތުހުމަތުގައި ތިބި މީހުންނެވެ. އަދި އެކަންކަން ރަނގަޅަށް ނުބަލައި، އެމީހުން ހަމަ ހުރެފައި ދޫކޮށްލަން އެއްވެސް ރައްޔިތަކު ބޭނުންވާނެތޯ ރައީސް ވަނީ ސުވާލުކުރައްވާފައެވެ.

މިރޭގެ ބައްދަލުވުމުގައި ރައީސް ވަނީ ވާނުވާ ބަންދުގައި ތިބި މީހުންގެ ތަފްސީލްތައްވެސް ހާމަކުރައްވާފައެވެ:

ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވީ، ޖުޑިޝަރީ މިނިވަންކޮށް މި ގެންނަ ބަދަލުތަކުގެ ސަބަބުން ވާނުވާ ބަންދުގެ މައްސަލައަށް ޙައްލު ލިބޭނެ ކަމުގެ ވަރަށް ބޮޑު ޔަޤީންކަމެއް އެބައޮތްކަމަށެވެ.

ޝަރީއަތް ނިމެންދެން ބަންދުގައި ތިބީ 347 މީހުން؛ ކުށުގެ ގޮތުން އެހާފަސޭހައިން ދޫކޮށެއް ނުލެވޭނެ

މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް ޢަބްދުއްރައްޒާޤް ޙަލީމް ވިދާޅުވީ، އަންނަ އަހަރުގެ ތެރޭގައި ހުޅުމާލޭ ހޮސްޕިޓަލްގައި އެޑްމިޓްކޮށްގެން ނަފްސާނީ ބަލިތަކަށް ފަރުވާދެވޭނެ ޚިދުމަތް ފެށޭނެ ކަމަށާއި، މާލެ ސަރަޙައްދުގެ ޞިއްޙީ ޚިދުމަތްތައް އިތުރު ހަރުފަތަކަށް ޖެހޭނެ ކަމަށެވެ.

މިކަން ހާމަކުރައްވަމުން ސީއީއޯ އިބްރާހީމް ޢަބްދުއްރައްޒާޤް ޙަލީމް ވާހަކަދެއްކެވީ ޕީއެސްއެމް ނިއުސްގެ "ހަފްތާ 104" ޕްރޮގްރާމްގައެވެ. އަންނަ އަހަރަށް ލަފާކުރާ ދައުލަތުގެ ބަޖެޓުގައި އެންމެ ބޮޑު އިންސައްތައެއް ކަނޑައަޅާފައިވާ އެއް ދާއިރާއަކީ ޞިއްޙީ ދާއިރާއެވެ. 8 ބިލިޔަން ރުފިޔާގެ ބަޖެޓެއް ޞިއްޙީ ދާއިރާއަށް ކަނޑައަޅާފައިވާއިރު، ޢުމްރާނީގޮތުން ވަޞީލަތް ހޯދުމަށް މި ބަޖެޓުގެ ތެރެއިން ގިނަ މަސައްކަތްތަކެއް ކުރުމަށް ސަރުކާރުންވަނީ ނިންމަވާފައެވެ. ސީއީއޯ ވިދާޅުވީ، މި ބަޖެޓުގެ ތެރެއިން މާލެ ސަރަޙައްދުގެ ހޮސްޕިޓަލްތަކުގައި މުހިންމު ގިނަ މަސައްކަތްތަކެއް އަންނަ އަހަރު ކުރުމަށް ނިންމާފައިވާކަމަށެވެ.

އޭގެ ތެރޭގައި، ވިލިމާލޭ ހޮސްޕިޓަލް ތަރައްޤީކުރުމަށްޓަކައި ވަގުތީގޮތުން ހޮސްޕިޓަލްގެ ޚިދުމަތް ހުޅުމާލޭ ހިޔާއަށް ބަދަލުކުރުމުގެ މަސައްކަތް ކުރަމުންދާ ކަމަށާއި، އެސެޓަޕްގައި އިތުރު ޚިދުމަތްތައް ފެށުމަށް ހަމަޖެހިފައިވާ ކަމަށް ސީއީއޯ ވިދާޅުވިއެވެ. މީގެ އިތުރުން، ހުޅުމާލޭ ހޮސްޕިޓަލުގައިވެސް މުހިންމު މަސައްކަތްތަކެއް ކުރުމަށް އަންނަ އަހަރަށް ޕްލޭންކޮށްފައިވާއިރު، މުހިންމު ގިނަ ޚިދުމަތްތަކެއް އަންނާނެ ކަމަށް އޭނާ ވިދާޅުވިއެވެ. އެގޮތުން، އިތުރު އެނދުތައް ޤާއިމުކުރުމަށް ހަމަޖެހިފައިވާއިރު، ބައެއް އިތުރު ޚިދުމަތްތައް ފެށުމަށްވެސް ތައްޔާރުވަމުންދާ ކަމަށާއި، ހާއްސަކޮށް މެންޓަލް ހެލްތުގެ ދާއިރާ ފުޅާކުރުމަށް ނިންމާފައިވާކަމަށް ސީއީއޯ އިބްރާހީމް ޢަބްދުއްރައްޒާޤް ޙަލީމް ވަނީ ހާމަކުރައްވާފައެވެ.

ނަފްސާނީ ބަލީގެ ފަރުވާ އަންނަ އަހަރު އިތުރަށް ފުޅާކުރާނެ:  ޙަލީމް 

ދިވެހިރާއްޖެއިން ޖަޕާނަށް ކަނޑައަޅާ ސަފީރުކަމުގެ މަގާމަށް، ކުރީގެ ޔޫތު މިނިސްޓަރު އަޙުމަދު މަޚްލޫފް މިއަދު ރަސްމީކޮށް އައްޔަންކުރައްވައިފިއެވެ. ރައީސް އޮފީހުން ބުނި ގޮތުގައި، މި މަގާމަށް އޭނާ އައްޔަންކުރެއްވީ މިއަދު ހެނދުނު ބޭއްވި ރަސްމިއްޔާތެއްގައި ހުވާކުރެއްވުމަށް ފަހުއެވެ. މަޚްލޫފް މި މަގާމަށް އައްޔަންކުރުމާ ގުޅިގެން، ޚާއްސަކޮށް އޭނާ ވަރަށް ފަހުން ޕާޓީ ބަދަލުކުރައްވައި ޕީއެންސީއާ ގުޅިވަޑައިގަތުމާ ގުޅިގެން ގިނަ ފާޑުކިޔުންތައް ވަނީ އަމާޒުވެފައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، މަޚްލޫފްގެ ނަން ޖަޕާން ސަފީރުކަމަށް ރައްޔިތުންގެ މަޖިލީހަށް ފޮނުއްވީ މިދިޔަ މަހުގެ 26 ވަނަ ދުވަހުއެވެ. އެ ދުވަހު ރިޔާސަތުން ވަނީ މި ނަމާ ގުޅޭގޮތުން ދިރާސާކުރުމަށް ޚާރިޖީ ގުޅުންތަކާބެހޭ ކޮމިޓީއަށް ފޮނުވާފައެވެ. ކޮމިޓީން އޭނާއާ އިންޓަވިއުކުރުމަށް ފަހު، އެ މަގާމަށް އައްޔަންކުރުމަށް ފެންނަ ކަމަށް ނިންމިއެވެ. ޕީއެންސީއަށް ސުޕަމެޖޯރިޓީ އޮތް ރައްޔިތުންގެ މަޖިލީހުން އިއްޔެ ވަނީ މަޚްލޫފަށް އެ މަގާމަށް ރުހުންދީފައެވެ. ފާހަގަކޮށްލެވޭ ގޮތުގައި، މަޖިލީހުން ރުހުން ދިންތާ 24 ގަޑިއިރެއްހާ ކުޑަ ވަގުތެއްގެ ތެރޭގައި ރައީސް ވަނީ އޭނާ އެ މަގާމަށް އައްޔަންކުރައްވާފައެވެ.

މަޚްލޫފަކީ މިދިޔަ މަހުގެ 14 ވަނަ ދުވަހު ޕީއެންސީން ބޭއްވި ބޮޑު ޖަލްސާއެއްގެ ތެރެއިން އެ ޕާޓީއާ ގުޅިވަޑައިގެންނެވި ބޭފުޅެކެވެ. ވަރަށް ފަހުން އޭނާ ވަނީ ކުރިން ނިސްބަތްވެވަޑައިގަންނަވާ އެމްޑީޕީން ވަކިވެވަޑައިގެންފައެވެ. ސަފީރުކަމަށް އައްޔަންކުރަން އޭނާގެ ނަން ފޮނުއްވި ހިސާބުން ފެށިގެން، ޕާޓީ ބަދަލުކުރުމުގެ ސަބަބުން ގިނަ ބައެއްގެ، ޚާއްސަކޮށް ސިޔާސީ ބޭފުޅުންގެ، ފާޑުކިޔުން ވަނީ އަމާޒުވެފައެވެ.

މަޚްލޫފްގެ ސިޔާސީ ހަޔާތަށް ބަލާއިރު، ރާއްޖެއަށް ޕާޓީ ނިޒާމު ތައާރަފްވެގެން އައި ދުވަސްވަރު އުފެއްދި އަދި އޭރުގެ އެންމެ ބޮޑު އެއް ޕާޓީ ކަމަށްވާ ޑީއާރްޕީން އޭނާ ސިޔާސީ ހަޔާތް ފެއްޓެވިއެވެ. އެ ޕާޓީގެ ތެރޭގައި އުފެދުނު ޚިޔާލު ތަފާތުވުންތަކަށް ފަހު، ޕީޕީއެމް އުފެއްދުމުގެ މަސައްކަތުގައި މަޚްލޫފް ވަނީ އިސް ދައުރެއް އަދާކުރައްވައިފައެވެ. ނަމަވެސް، ޕީޕީއެމްގެ ވެރިކަމުގައި އޭނާ ވަނީ ކުރީގެ ރައީސް ޢަބްދުﷲ ޔާމީނާ ދެކޮޅަށް ނުކުމެވަޑައިގެންނެވިއެވެ. އޭރު އޮތް އިދިކޮޅު އިއްތިހާދުގެ ހަރަކާތްތަކުގައި އިސް ދައުރެއް އަދާކުރެއްވިއިރު، އެ ވެރިކަމުގައި މަޚްލޫފް ޖަލަށް ވެސް ލެވުނެވެ. އެއަށް ފަހު، އޭނާ އެމްޑީޕީއަށް ސޮއިކުރެއްވިއެވެ. އަދި، އެމްޑީޕީގެ ވެރިކަމުގައި މަޚްލޫފަށް ވަނީ ޔޫތު މިނިސްޓަރުކަން ދީފައެވެ. ނަމަވެސް، އެ ޕާޓީއަށް ވެރިކަން ގެއްލުނު ފަހުން މަޚްލޫފް ސިޔާސީ ހަރަކާތްތަކުން ގެއްލިފައި ހުއްޓާ، މިހާރު ވަނީ އަލުން ސިޔާސީ މަސްރަހަށް ނުކުމެވަޑައިގެން ޕީއެންސީއާއި ގުޅިވަޑައިގެންފައެވެ.

ޖަޕާން ސަފީރުކަމަށް މަހުލޫފް މިއަދު އައްޔަންކުރައްވައިފި

ގަލޮޅު ދެކުނު ދާއިރާގެ މެންބަރު މީކާއިލް އަޙްމަދު ނަސީމް ރޭ ވިދާޅުވެފައިވަނީ، ކޮމިޝަނަރ އޮފް ޕޮލިސް (ސީޕީ) އިސްމާޢިލް ނަވީން މަގާމުން ވަކިކޮށް ސަރުކާރުން މަސައްކަތްކުރަނީ ސިޔާސީ ނުފޫޒު ނުފޯރުވޭ ފުލުހުން ކޮންޓްރޯލް ކުރުމަށް ކަމަށެވެ. މީކާއިލް މިކަން ހާމަކުރެއްވީ ރާއްޖެޓީވީގެ ޕްރޮގުރާމެއްގައި ވާހަކަ ދައްކަވަމުންނެވެ.

އެމްޑީޕީގެ ޕާލިމެންޓްރީ ގުރޫޕްގެ މެންބަރު މީކާއިލް ވިދާޅުވި ގޮތުގައި، ދާދިފަހުން 241 ކޮމިޓީގައި ހިނގާދިޔަ ކަންކަމުން ފާހަގަވަނީ ވަކި ބޭފުޅަކު ކޮމިޝަނަރ އޮފް ޕޮލިސް ކަމަށް ގެނައުމަށްޓަކައި ކުރަންޖެހޭ ހުރިހާ ކަމެއް މިހާރު ކުރިއަށްދާ ކަމެވެ. އޭނާ ފާހަގަކުރެއްވި ގޮތުގައި، މިހާރުގެ ކޮމިޝަނަރ އޮފް ޕޮލިސް އިސްމާޢިލް ނަވީންއަކީ ސަރުކާރަށް ނުފޫޒު ނުފޯރުވޭނެ ބޭފުޅެއް ކަމުން، ނަވީން މަގާމުން ދުރުކުރުން ސަރުކާރަށް ކޮންމެހެންވެސް މުހިންމުވެފައިވާ ކަމަށް ފެނެއެވެ.

"މިއީ ކޮންމެހެން އިންސާފުވެރި އެއްކަލަ ތަހުގީގެއް ކޮށްގެން ދާންޖެހޭތީވެ ފޮނުވާލަނީކީއެއް ނޫން. އެބޭފުޅުންނަށް (ސަރުކާރަށް) ކޮންޓްރޯލް ނުކުރެވޭތީވެ، އެބޭފުޅުންގެ މީހަކު ކޮމިޝަނަރ އޮފް ޕޮލިސް ކަމަށް ގެންނަން ހިންގާ ވަރަށް ބޮޑު ރޭވުމެއް،" މީކާއިލް ވިދާޅުވިއެވެ.

މީގެ އިތުރުން މީކާއިލް ވިދާޅުވީ، މިފަދަ ކަންތައްތަކެއް ފަނޑިޔާރުންނަށް ވެސް ދިމާވަމުންދާ ކަމަށް ފެންނަ ކަމަށެވެ. ޕޮލްކޯ ކޮރަޕްޝަން ރިޕޯޓާއި ސިފްކޯ ރިޕޯޓާ ގުޅޭގޮތުން ވާހަކަ ދައްކަވަމުން، މި ސަރުކާރަށް ދެއަހަރު ވެގެންގޮސްފައިވާއިރު، މިކަންކަން މިހާރު މި ހުށައަޅައިގެން އުޅެނީ ކީއްވެތޯ މީކާއިލް ސުވާލުކުރެއްވިއެވެ. އެހެންކަމުން، މިއަދު ފެންނަނީ ސިފައިންނާއި ފުލުހުންގެ ތެރެއިން ސިޔާސީ ނުފޫޒު ނުފޯރުވޭ ބޭފުޅުން ކޮންޓްރޯލް ކުރަން ސަރުކާރުން މަސައްކަތް ކުރާތަންކަމަށް އޭނާ ވިދާޅުވިއެވެ. އަދި މިކަން ސިފަކުރެވެނީ ބްލެކްމެއިލް ކުރުމުގެ ބޭނުމުގައި ހިންގާ ހަރަކާތެއްގެ ގޮތަށް ކަމަށްވެސް މީކާއިލް ވަނީ ފާހަގަކުރައްވާފައެވެ.

ސީޕީ ވަކިކޮށް ސަރުކާރުން އުޅެނީ ސިޔާސީ ނުފޫޒު ނުފޯރުވޭ ފުލުހުން ކޮންޓްރޯލްކުރަން: މީކާއީލް

އެމްޑީޕީގެ ކުރީގެ ޗެއާޕާސަން އަދި އިޤްތިޞާދީ ތަރައްޤީއަށް ކުރީގެ މިނިސްޓަރ، ފައްޔާޒް އިސްމާއިލް ވިދާޅުވެފައިވަނީ، ބުނާ ބަހަކުން ނުވަތަ ފާޅުކުރާ ހިޔާލަކުން އެއްވެސް މީހެއްގެ ވަޒީފާއަށް ބަދަލެއް ގެނެވިގެން ނުވާނެ ކަމަށެވެ.

ފައްޔާޒް މިހެން ވިދާޅުވީ، ހުވަދުއަތޮޅު އުތުރުބުރީ ގެމަނަފުށީ ސްކޫލުގައި އެރަށު ދޮންބަގީޗާގޭ، އަމާނުﷲ އަދާކުރަމުން ދިޔަ ވަޒީފާ އެއަތޮޅު ދެކުނުބުރީ ވާދޫ ޖަމާލުއްދީން ސްކޫލަށް އެޑިއުކޭޝަން މިނިސްޓްރީން ބަދަލު ކުރުމާ ގުޅިގެންނެވެ. އޭނާ މިކަމާ ގުޅިގެން އެކްސް (ކުރިން ޓްވިޓަރ) ގައި ހިއްސާކުރި ޕޯސްޓެއްގައެވެ.

އަމާނުﷲގެ ވަޒީފާ ބަދަލުކުރުމަކީ ސަރުކާރުން އޭނާއަށް ދިން ބޮޑު އަނިޔާއެއް ކަމަށް ފައްޔާޒް ވިދާޅުވިއެވެ. "އެޑިއުކޭޝަން މިނިސްޓްރީން ބޭއިންސާފުން އަޅާ މިފަދަ ފިޔަވަޅުތަކަކީ ވަޒީފާގެ ރައްކާތެރިކަމެއް މިއަދު އެއްވެސް މުވައްޒަފަކަށް ނެތްކަން ސާފުވާ ކަމެއް. ބުނާ ބަހަކުން ނުވަތަ ފާޅުކުރާ ހިޔާލަކުން އެއްވެސް މީހެއްގެ ވަޒީފާއަށް ބަދަލެއް ގެނެވިގެން ނުވާނެ." ފައްޔާޒް އޭނާގެ ޕޯސްޓުގައި ލިޔުއްވާފައިވެއެވެ.

އޭނާ އިތުރަށް ވިދާޅުވީ، މިނިސްޓްރީތައް މެދުވެރިކޮށް ސިޔާސީ ގޮތުން ނުފޫޒާއި ބިރު ދެއްކުމުގެ ސިޔާސަތު އަލުން އިއާދަކުރުމަކީ ބަލައިގަނެވޭނެ ކަމެއް ނޫން ކަމަށެވެ.

ބުނާ ބަހަކުން ނުވަތަ ފާޅުކުރާ ހިޔާލަކުން ވަޒީފާއަށް ބަދަލު ގެނެވިގެން ނުވާނެ: ފައްޔާޒް

ސްރީލަންކާ އަށް އަރާ ފެންބޮޑުވުންތަކާއި ތޫފާން "ޑިޓްވާ" އާ ގުޅިގެން އެ ގައުމަށް ލިބުނު ބޮޑެތި ގެއްލުންތަކުން އަރައިގަތުމަށް އެހީވުމުގެ ގޮތުން ދިވެހި ސަރުކާރުން ދިނުމަށް ނިންމެވި 50،000 (ފަންސާސް ހާސް) ޑޮލަރު، ސްރީލަންކާ ސަރުކާރާއި ރަސްމީކޮށް ހަވާލުކޮށްފިއެވެ.

މިއެހީ ލަންކާ ސަރުކާރާއި ހަވާލުކޮށްދެއްވީ، ރާއްޖެއިން ސްރީލަންކާއަށް ކަނޑައަޅުއްވާފައި ހުންނަވާ ސަފީރު، މަސްއިދު އިމާދެވެ. ލަންކާ ސަރުކާރުގެ ފަރާތުން މިއެހީއާ ހަވާލުވެވަޑައިގަތީ އެގައުމުގެ ހާރިޖީ ވަޒީރު ވިޖިތާ ހެރަތުއެވެ. މިރަސްމިއްޔާތު އޮތީ ކޮލޮމްބޯގައި ހުންނަ ސްރީލަންކާގެ ހާރިޖީ ވުޒާރާގައެވެ.

ދިވެހި ސަރުކާރުން މި އެހީ ދިނުމަށް ނިންމެވީ މިދިޔަ ހޮނިހިރު ދުވަހުއެވެ. އެއިރު ހާރިޖީ ވުޒާރާއިން ވިދާޅުވީ، ލަންކާގެ އެކި ހިސާބުތަކަށް ބޯކޮށް ވާރޭ ވެހި، އެގައުމުގެ ރައްޔިތުންނަށް ލިބިފައިވާ ގެއްލުންތަކާއި ދަތިތަކުން އަރައިގަތުމަށް އެހީތެރިވުމުގެ ގޮތުންނެވެ. 50،000 ޑޮލަރާއެކު، 25،000 މަސް ދަޅު ކޭސް ވެސް ހަދިޔާކުރަން ވަނީ ނިންމާފައެވެ.

މި އެހީގެ ސަބަބުން ހާލުގައި ޖެހިފައިވާ ލަންކާގެ ރައްޔިތުންނަށްއެހީތެރިކަން ލިބި، ލަންކާ ސަރުކާރުން ކުރަމުންދާ މަސައްކަތަށް ކޮންމެވެސް ވަރެއްގެ ލުޔެއް ލިބޭނެ ކަމަށް ދިވެހި ހާރިޖީ ވުޒާރާއިން އުންމީދު ކުރައްވައެވެ. ލަންކާއަށް ކުރި ވިއްސާރައިގައި އެ ގައުމުން 450 އަށް ވުރެ ގިނަ މީހުން ވަނީ މަރުވެފައެވެ. މި ހާލަތުގައި ލަންކާ ސަރުކާރުން ވަނީ ބައިނަލްއަގުވާމީ އެހީއަށް އެދިފައެވެ.

ރާއްޖެއިން ފޯރުކޮށްދިން އެހީއަށް ޝުކުރު އަދާކުރައްވަމުން ލަންކާގެ ހާރިޖީ ވަޒީރު ވިޖިތާ ހެރަތު މީސް މީޑިއާގައި ހިއްސާކުރެއްވި ޕޯސްޓެއްގައި ވިދާޅުވީ، މި ހިތާމަވެރި ހާލަތުގައި ލަންކާ ރައްޔިތުންނާއެކު ދިވެހި ރައްޔިތުން ތިބިކަން ހާމަކޮށްދިނުމަކީ ދެ ގައުމުގެ މެދުގައި އޮތް ވަރުގަދަ ގުޅުން ދައްކުވައިދޭ ކަމެއް ކަމަށެވެ.

މި ފައިސާގެ އެހީގެ އިތުރުން، ލަންކާއަށް އެހީވުމަށް ޕީއެސްއެމުން އިސް ނަގައިގެން ރާއްޖޭގެ ގިނަ މީޑިއާތަކަކާ ގުޅިގެން ކުރިއަށް ގެންދިޔަ "ސިލޯނާއެކު ދިވެހީން" ޓެލެތޯނަށް 800،352 ޑޮލަރު ނުވަތަ 245 މިލިއަން ލަންކާ ރުޕީސް ލިބުނެވެ. އެ ފައިސާ ވެސް މިއަދު ދިވެހި ހާރިޖީ ވުޒާރާއާ ވަނީ ހަވާލުކޮށްފައެވެ.

ދިވެހި ސަރުކާރުން ހަދިޔާ ކުރި 50،000 ޑޮލަރު ލަންކާ ސަރުކާރާއި ހަވާލުކޮށްފި

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، އިނގިރޭސިވިލާތަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު، މިއަދު މާލެ ވަޑައިގެންފިއެވެ. ރައީސް އޮފީހުން މަޢުލޫމާތު ދެއްވާ ގޮތުގައި، އެމަނިކުފާނުގެ މި ދަތުރުފުޅަކީ، އިނގިރޭސިވިލާތުގެ ރަސްގެފާނު، ހިޒް މެޖަސްޓީ ޗާލްސް ތިންވަނައިގެ އިސްނެންގެވުމުގެ ދަށުން އިންތިޒާމްކުރެވުނު "ހައި-ލެވެލް ބްރީފިންގ އޮން ޕްރައިވެޓް ކެޕިޓަލް މޮބިލައިޒޭޝަން" ގައި ބައިވެރިވެވަޑައިގެންނެވުމަށް ކުރެއްވި ދަތުރުފުޅެކެވެ.

މި ބައްދަލުވުމުގައި، ބައިނަލްއަޤްވާމީ ޑިވެލޮޕްމަންޓް ބޭންކްތަކާއި (އެމް.ޑީ.ބީ.) ޕްރައިވެޓް ފައިނޭންސް ފޯރުކޮށްދޭ އިންސްޓިޓިއުޝަންތަކުގެ އިސްވެރީން ބައިވެރިވެވަޑައިގެންފައިވެއެވެ. މި ބައްދަލުވުމުގެ މައިގަނޑު މަޤްޞަދަކީ، ދެމެހެއްޓެނިވި ތަރައްޤީއަށާއި، ދުނިޔޭގެ މޫސުމަށް އަންނަ ބަދަލުތަކަށްޓަކައި މާލީ އެހީތެރިކަން ފޯރުކޮށްދިނުމުގެ މަސައްކަތްތައް ހަލުވިކުރުމާ ބެހޭގޮތުން މަޝްވަރާކުރުމެވެ.

މި ބައްދަލުވުމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވަނީ "ޑެޓް-ފޮރ-ކްލައިމެޓް" އަދި "ޑެޓް-ފޮރ-ނޭޗަރ" މަޝްރޫޢު ކުރިއެރުވުމަށާއި، ތިމާވެއްޓާ ރައްޓެހި ޕްރައިވެޓް ފައިނޭންސް ފޯރުކޮށްދޭ މަރުކަޒުތަކުގެ އެއްބާރުލުން އިތުރުކުރުމާގުޅޭ މަޝްވަރާތަކުގައި ބައިވެރިވެވަޑައިގެންފައެވެ. އެމަނިކުފާނު ވަނީ ދިވެހިރާއްޖެއަށާއި ކުދި ޖަޒީރާ ޤައުމުތަކަށް ކުރިމަތިވެފައިވާ ގޮންޖެހުންތަކާއި މާލީ އެހީތެރިކަމުގެ ބޭނުންތައް ފާހަގަކުރައްވައި، އެކަންކަމަށް ހައްލު ހޯދުމަށް މަގުފަހިކުރެވިދާނެ ގޮތްތަކެއް ހުށަހަޅުއްވާފައެވެ.

މި ދަތުރުފުޅުގެ ސަބަބުން ދިވެހިރާއްޖެއާއި މަތީ ފެންވަރުގެ ބައިވެރިންނާ ދެމެދު އޮތް ގުޅުން އިތުރަށް ބަދަހިކުރުމަށް ވަރަށް މުހިންމު ފުރުސަތެއް ލިބިގެންދިޔައެވެ. އަދި ދުނިޔޭގެ ދެމެހެއްޓެނިވި ތަރައްޤީގެ ލަނޑުދަނޑިތަކާ އެއްގޮތަށް، އިންސާފުވެރި އަދި ދެމެހެއްޓެނިވި މާލީ އެހީއަށް ރާއްޖެއިން ކުރާ ވަކާލާތު އިތުރަށް ވަރުގަދަވެގެން ގޮސްފައިވާކަމަށް ރައީސް އޮފީހުން ވިދާޅުވެއެވެ.

ޙަބަރު